作為全球第三大銀行嘅滙控集團，其國際地位得以確立，同集團嘅管理骨幹──國際行政人員（IO）制度息息相關，呢批「周圍飛」嘅專才，如集團主席龐約翰、滙豐前亞太主席艾爾敦同現任亞太行政總裁邵銘高等，都係隨時準備好調派往全球七十七個國家不同崗位，可能朝早喺香港，下晝通知出發去阿根廷。咁高挑戰性，唔係人人都頂得順。
滙控行政總裁葛霖最近就出咗份內部通傳，鼓勵部門主管挑選一些具潛力嘅優秀同事，進行短期跨國調職計劃。
滙豐工商業務環球聯席主管梁高美懿話，借調計劃年期約兩三年，同事都係自願參加，並不限於主管階層，計劃可拓展同事視野增強國際經驗，亦為各個地區行政主管本地化作出部署。
梁太剛晉升為滙豐集團總經理，係首位女性華人出任此職，真係婦女界樣板。目前全球只有土耳其滙豐嘅行政總裁，係由女性出任。
爆料熱線：29290000、27860099
報料傳真：26239278
報料電郵：[email protected]