楊思琦昨日跟苗僑偉為劇集《上海風雲》趕工，他倆在劇中飾演父女，在店內做小籠包。不過他們落手搓豬肉時，完全不擔心會染上豬鏈球菌，因他們都相信政府不會將有問題豬肉入口。
楊思琦、張可頤、黃宗澤和苗僑偉主演的《上海風雲》昨日在尖沙嘴翡翠拉麵小籠包學做小籠包，故事講述苗僑偉飾演的退隱江湖人物開設了一間小籠包店，他與女兒楊思琦父女檔打理店舖。昨日苗僑偉、張可頤和黃宗澤等在店裏學包小籠包，不過記者發現他們完全沒有顧及衞生。
好難避免
香港近期發生多宗市民感染豬鏈球菌事件，記者見楊思琦等在搓生豬肉來包小籠包時，連手套亦沒有戴，楊思琦滿有信心地說：「我嘅手又冇傷口，所以冇戴手套都唔使驚，總之樣樣嘢都小心啲咪得囉。師傅話戴咗手套去整，啲小籠包會整得唔靚，所以我索性唔戴。其實拍戲嘅嘢都唔擔心得咁多，就算會有危險都好難避免，呢輪豬肉有事，魚又話有事，真係唔知重有乜可以食，呢排我都係食菜多。」
信晒政府
張可頤亦用手搓豬肉，問她擔不擔心感染豬鏈球菌？她說：「唔怕，政府如果覺得啲豬肉有問題，點會畀啲有問題嘅豬肉入口？呢啲豬肉應該唔會有問題，所以今日學做小籠包，我唔認為需要做乜安全措施。」
由於劇情講述張可頤是包小籠包能手，所以有些近鏡會拍她的一雙手在包小籠包，如果她學得不像樣，導演可能要用替身，但張可頤就盡量不想用替身演出。
採訪：魯萍 攝影：陳慧安
