舊工作做完，開始接洽新的工作，傾完興趣、時間、金錢這些大前提後，最後的臨門一腳便是傾合約。
睇合約是天下間最悶人的事，平時連稍為悶少少嘅故事都唔想睇，合約豈止悶，簡直無聊兼無癮。以前嘅人合作做事，牙齒當金使，重有強烈嘅合作精神與互信基礎，雙方相信有錢大家搵，同心合力打出一片天，簽唔簽合約，反而是其次。時代進步，事事講求有規有矩，有根有據，於是要簽合約，既然簽得合約，即係將來遇到有事發生時唔講感唔感情，齋攞一大叠紙出嚟對簿公堂，於是為了保障百分百的利益，條款之涵蓋上天入地，穿梭時空，例如編劇的創作版權將屬於公司所有，過去、現在、將來都是；為了保障將來可能在火星也有電影放映，所以用上了「全宇宙」這地域名詞；VCD、DVD、CableTV、InternetTV科技日新月異，所以要標明現在至將來的所有新發明媒介也包括在內，睇到就好笑，但諗真又笑唔出。
合約內的文字是出奇地唔想人睇得明，其中所用嗰啲字之婉轉、艱澀、悶蛋、重複、搵笨，簡直係睇幾行就想瞓一覺。這一大堆唔想人睇得明的文字是一群熟悉法律人士嘔心瀝血地玩弄文字的結果，唔想俾人搵笨就得先俾人搵個小笨，找專科的人對專科的人，大家鬥搵笨。
曾聽到有些有錢佬是因為本身係合約專家，往往在合約中暗藏了若干殺機，最後告到對方甩褲兼割地賠款而致富。時代進步了，誠信、合作精神卻越來越少了。