譚詠麟（阿倫）前日預祝五十五歲牛一，佢今年搞咗個生日會，但佢就行蹤詭秘，開Ｐ竟然唔見壽星仔出席，原來佢走咗去銅鑼灣柏寧酒店見白龍王，睇嚟白龍王對唔少圈中人嚟講，真係好有吸引力。
阿倫前晚本來約咗成班朋友包括陳百祥、黃杏秀同彭健新等喺跑馬地Oyster蠔店包場開Ｐ慶祝，但到凌晨一點幾曲終人散嗰陣都唔見阿倫出現，但喺同一時間，佢分別同成龍、盧惠光、曾志偉等竟然喺柏寧酒店出現，原來係因為白龍王嚟咗香港，重喺酒店度車輪見客，順便同啲圈中人敍舊㖭，唔知阿倫係咪個唱開鑼在即，嚟緊又工作多多，所以要請白龍王指點一下呢？
志偉瞌眼瞓
而志偉前晚見過白龍王後，就同三位男伴一齊喺酒店咖啡室傾偈，其間見志偉成個人攤喺椅上，一臉嚴肅咁，直至臨近天光，佢終於頂唔順瞌眼瞓，要不時用手捽面保持清醒，之後佢嘅司機重開車送晒其他同伴返屋企。
而阿倫噚日打咗電話上港台嘅《開心日報》，同時佢嘅老友阿叻同克勤亦齊齊喺節目唱生日歌祝佢生日快樂，阿倫重透露噚晚正日生日會喺紅館綵排度過㖭。
