工總噚日北上拜會多個中央部門，首站係勞動及社會保障局，傾吓港人好關心嘅社會保障金問題。工總副主席劉展灝了解過後話，只係嗰啲長期喺國內工作、簽有勞動合同嘅港人，公司先要為佢哋畀社保金，一星期返上去做一、兩日嘢嘅人就唔算。咁點先係長期工作同簽有勞動合同？佢話可參考國內入息稅例，喺內地做滿一百八十三日先要繳稅，屆時亦必須要同公司簽訂一份國內勞動合同。
內地港商咁多，呢單嘢都好煩。如果要供，供款率初步了解係員工供百分之八，公司供百分之二十，甘過強積金好多；員工供滿十五年可以喺原工作省市取回保障金，若期間轉工到第二個省，可以繼續供款，期滿喺第二個省攞返。新措施係配合開放國內人力市場，畀港人北上打工，兼提供福利保障，聽落比強積金彈性更大。劉展灝估計涉及嘅港人多達幾十萬，而港商為員工供國內社保金後，就唔需要再喺香港為佢哋供強積金。
傳真︰2623-9278
電郵︰[email protected]