大市早段重係好地地，午後又走樣。花旗集團將長和降級，建議沽售，大藍籌應聲下挫，長和同中移動（941）均跌逾3%，恒指萬五點關失守，收報14973，大跌244點。
長和明日就派中期成績表，花旗𠵱家至擔心和黃（013）業績會受3G拖累，遲唔遲啲呀！大鱷做嘢，梗有消息配合，資深股民應該見慣不怪。大市短線雖利淡，中長線向好不變，優質股要趁低收集。
市場普遍預期中國保險公司業績理想，平安保險（2318）揭開序幕，果然「對辦」，05年（12月年結）上半年，平保收入326億元（人民幣．下同），盈利22.5億元，升47%，遠比市場所預期的30%升幅為佳，每股基本收益0.36元，不派中期息。
盈利理想，主要原因係核心業務人壽保險和財產保險業務均取得較好業績，公司因應股市波動，改善投資組合的資產分配，債券投資收益上升，而在中國股市的投資損失則減少。同時，產品結構進一步優化，亦令毛利率上升。
平保對前景展望樂觀，為因應人民幣滙率變化，未來會增加貨幣資產及債券方面的投資，目前海外投資資產佔總資產約8%。估計全年盈利約47億元，每股收益0.75元（折0.72港元），預測PE不足19倍，股價仍有上升空間。
中國人壽（2628）將於29日公布業績，聽中資消息，國壽的盈利表現可能會帶來更大的驚喜，佢哋近期亦不斷在市場吸納，短期目標係7字頭。
國壽有優勢可低吸
國壽在內地壽險市場居領導地位，05年上半年，國壽保費收入911.45億元，市場佔有率45.38%，6月份收入200億元，表現理想。盈利預期會大增外，國壽重有好大機會成為外商進軍中國保險市場的踏腳石，問題係國壽在市場佔有極大優勢，外商出價要好吸引，才會成事。
國壽C輪推介過兩隻，3966同3524，前者就快到期，想換馬，可揀3967，今年11月7日到期，認股價6.20元，期限較3524短21日，但溢價亦較低，國壽若見7元，3967平水計，都可見0.80元，升幅成158%！
郭兆誠