創業板股當真否極泰來？自從金屬電子交易所（8161）轉型做大陸彩票股後炒得㷫烚烚，兼獲大行垂青幫手搞埋批股後，年輕賓架就話多咗人想買創業板殼，令殼價都升咗唔少。
好似噚日就有隻華智控股（8065）公布控股權易手，復牌升咗29.63％，收3.5仙，但成交就好細，只得315萬股，金額11.32萬大元，好明顯係乾升格局。查實人哋殼都未買完，實在無乜理由喺呢個時候大炒。
除咗創業板殼股有價外，主板殼股亦多咗人吼，例如近期股價波動的廣益國際（530），年輕賓架話佢亦被列為有得斟的對象之一，唔排除股價波動因此而起。
廣益喺濠賭股炒得興起之時，曾經都話想染濠，點知就搞咗單羅生門事件，家陣公司實情做緊乜生意，睇怕唔係太多人講得出，所以被視為殼股並唔難理解。
昨日大跌市，廣益都無情情炒上8.33%，收報1.3仙，成交股數有2.11億股，金額272.44萬元。
慕容小初