印刷Ｐ之子自美國讀完大學回港，玩咗三個月，得印刷Ｐ之助，已經搵到份工，做中型經紀行分析員，一邊做一邊學，尚待磨練。印刷Ｐ覺得兒子入世未深，做分析師容易俾表面現象所迷惑，易信人言，於是不斷提點，但父子之間，一定有代溝，阿仔聽老竇教路，唔會入耳。
地產Ｙ教印刷Ｐ一條計仔，印刷Ｐ欣然從命。月前，某一樓盤發售，印刷Ｐ對小Ｐ講：「嗱，我打本你去炒樓，畀三十萬你做膽，你去呢個新樓盤排隊，睇吓有冇得發圍。」小Ｐ睇報紙地產版睇得多，以為賺錢好易，第二朝一天光就起床，趕往售樓處排隊，咦，時間一分一秒過去，小Ｐ始終係企喺人龍中間，不上不落，點解呢？原來有好多人嚟睇樓，其中有啲面孔經常在名人版出現，個個都話有預約，唔使排隊。小Ｐ就當然要排啦，卒之排到黃昏，小Ｐ先至入到去。
唉，低層平價樓已經冇晒，二十樓至四十樓有海景，只餘最高嘅層數，三十八樓比二十一樓貴三分一，小Ｐ心中十五十六，唔知點揀好。售樓人員突然宣布，因時間關係，好多人重排緊隊，各人請快啲揀樓、畀支票（約五十萬元）。一位孕婦立即擠前，幾乎跌倒在地下，好彩隔籬有人扶起，孕婦二話不說，立即交支票。小Ｐ見狀，打電話畀印刷Ｐ，聲震震咁話：「點呀，好唔好買呀，就快俾人搶晒嘞！」印刷Ｐ叫小Ｐ鬆人，唔好買，小Ｐ抗議：「我排咗成日隊，你叫我唔好買？好唔抵喎？」印刷Ｐ堅持要小Ｐ鬆人，小Ｐ返到屋企，滿臉不悅之色，唔睬印刷Ｐ。
過咗兩個星期，該樓盤啲分層單位轉讓廣告，在報紙出現，多到睇唔晒。印刷Ｐ對小Ｐ講：「你𠵱家明白未？」小Ｐ亦係聰明仔，對老竇講：「買唔到唔使恨，學咗好多嘢。」呢個教仔方法，係地產Ｙ教印刷Ｐ嘅，小Ｐ自此知道炒新樓盤，唔識人就冇錢搵。