缸湖險惡,恒指前日彈升180點,1日冇晒,恒指散244點,萬五失守,收14974,有可能先下試14800。是日火種,係長實(001)與和黃(013),分別下跌3.4%與3.9%,影響氣氛。大價股喺對沖盤活動之下,變化如同細價股。喺輪市搵食,猶似喺葡京買大細,要輸抽水,即係輸溢價收縮,贏輸可能決定於運氣。
長實C輪3893:長實跌2.85元,兩隻熱門長實C輪9132與9129,分別下跌12.5仙與13仙,跌幅24%與26%。按照對沖值計算,兩隻輪跌幅啱數。
另1隻都算熱門嘅長實C輪3893,收56仙,跌24仙,跌幅30%。按照對沖值計算,只係應該跌20仙,即係隻輪昨日跌多咗4仙。4仙,已相等於輪價7%。博長實反彈,3893比較值得考慮。市況朦朧,升跌人為因素極大,做嘢都只係適宜注碼細細。
和黃C輪4815:和黃C輪4815跌25仙,跌幅23%,略大過按對沖值計算嘅跌幅。隻輪年底夠鐘,輪價85仙,溢價3.2%,槓桿率9倍(有效6.6倍),引伸波幅27%。博和黃反彈,4815可以細注諗吓,但若要炒出炒入,1日做幾次買賣,此輪交投則嫌細。
章盛