煲呔曾做咗新的特首近兩個月，仍然有各界人士祝賀佢榮任特區領導，所以話呢個世界有心唔怕遲，十月都係拜年時。
八方聽聞，本地蘇、浙、滬各界人士，九月十五日舉行嘅慶祝國慶大會，原來佢哋今年慶祝中華人民共和國成立五十六周年外，重慶祝埋特區成立八周年以及煲呔榮升特首。為咗隆重其事，特別請到梅葆玖先生率領京滬津同埋香港京劇名家，喺文化中心上演一套《穆桂英掛帥》，賀一賀佢。
做京劇賀香港仔
八方唔係票友，但係讀過白先勇嘅文章，都難忘佢對穆桂英一角嘅推崇，呢套一定係好戲。不過，由一直話係董先生系統嘅上海幫，做京劇賀個廣東或者香港仔，係咪有多少政治含義？
有人就話，楊家將故事家傳戶曉，演呢套劇賀煲呔實在可圈可點，皆因曾太真係巾幗不讓鬚眉。君不見煲呔參選時嘅名句「強政勵治、締造和諧、福為民開」就係曾太嘅手筆；連去出席參選活動，曾太都好搶鏡。之但係，楊家係因為七子去六子（楊六郎）歸，幾乎冇晒男人先要穆桂英掛帥，唔通特區真係咁大鑊，要出到曾太？
煲呔夜赴香港會
講開煲呔，佢前晚喺官邸同一班傳媒茶敍，臨到尾聲，在場嘅新聞處處長蔡瑩璧，不斷提醒記者時間到喇，大家問夠喇，似乎暗示煲呔之後有個重要約會咁。
不出八方所料，煲呔送別傳媒後，就急急腳趕去香港會，同一班非常支持自己嘅大人物食飯。究竟邊個咁威水，令煲呔夜一夜都蒲頭，唔返屋企食飯？之唔係大地產商鄭家純，代老竇李國寶出征嘅李民橋，政商界大紅人馮國經，以及董建成太太溫子華等等……
咁多有錢佬，政府方面自然不敢怠慢，除咗煲呔之外，肥龍及詩姐姐都有到場，簡直好似特區政府酒會咁。有與會者透露，席間都係風花雪月咁啦，大家對煲呔出席畀面派對好高興呢。
傳真︰2623-9278
電郵︰[email protected]