每逢有新盤開賣，地產代理幾乎例必搞個大型誓師會，為數以千計嘅員工打氣，又同時推銷個樓盤。 對於呢類陣容龐大嘅場面，唔少發展商都司空見慣。美聯噚日就搞搞新意思，用碧堤半島享有嘅醉人青馬大橋景做賣點之外，又搵嚟一對年輕舞蹈員，用動人舞姿，點出樓盤擁有嘅浪漫夜景。 暑假就快過去，市場人士亦期待大型新盤開賣，美聯噚日就搵咗個大鈸，由集團執董陳坤興與九倉黃光耀嚟個「雙劍合璧」敲響，象徵新盤市場快將開鑼，同時寓意呢個盤成績一鳴驚人。成效如何，下個月分曉。