曾經調查台灣總統陳水扁槍擊案嘅法證界猛人李昌鈺，噚日喺香港出席三年一度嘅「國際法庭科學大會」，喺呢個法證界「華山論劍」大會上，向嚟自世界各地近千個法證專家講解點樣靠科學偵破大案。阿扁肚皮上嘅彈痕曾經被人懷疑係咪真係槍傷，但李昌鈺話唔同角度開槍會造成唔同形狀嘅傷痕，經調查後證實阿扁嘅肚皮確係為子彈所傷。
有台灣記者問佢調查期間係咪有民進黨人搵過佢，佢話民進黨同國民黨嘅人都搵過佢，因為兩個黨都有唔少人係佢朋友。佢重話，法證專家除咗要搜集案發地點證據之外，重要應付記者日日追問單案有乜進展，所以壓力都唔小，但其實應付記者方法好簡單，記者用英文問問題，就用中文答佢；用中文問，就用英文答。佢話咁樣做係想記者知難而退，唔好再追問。
不過，香港係國際大都會，加上絕大部份記者都接受過高等教育，八方相信呢招應該難唔到啲行家。
傳真︰2623-9278
電郵︰[email protected]