因為一個翻騰動作而四肢癱瘓、曾一度尋求安樂死嘅阿斌，最近應承幫歌手張學友填詞，事緣學友早排間接知道阿斌需要一張輪椅，就搵人度身設計咗一張練習輪椅同埋一張電動輪椅畀阿斌，上個禮拜六橫風橫雨，學友山長水遠走去瑪麗醫院見佢。商台噚日播出咗阿斌嘅錄音片段，佢話會好好咁利用兩張輪椅出去重新認識呢個世界，希望重見十四年前所熟悉嘅景物，亦希望可以見到香港嘅變化。
阿斌重話預備寫本書，諗住搵學友寫序，學友拍心口應承，跟住打蛇隨棍上，請阿斌幫佢寫歌詞，自言音樂感好差嘅阿斌當堂打咗個突，學友就安慰佢，好多時都係有詞先有曲，叫阿斌放心寫咗篇詞先，其他佢會搞掂，終於就成咗事喇。
傳真︰2623-9278
電郵︰[email protected]