從事印刷業務之Ｐ先生不時來往上海香港之間，佢覺得在上海開出之班機，經常誤點，累佢在浦東機場呆等。內地服務作風與香港唔同，誤班理由唔使話畀顧客聽，如果碰上大霧、風暴、雷雨，更加誤上加誤，因為國內航機來往各大城市，現時非常繁忙，某航機喺某一機場唔郁得，牽一髮而動全身，其他機場嘅航機冇法子郁。
印刷Ｐ呢日認識咗一位熟悉內地航空人士Ａ君，乘機訴苦水。Ａ君甚表同情，但講明：「搭內地客機來港轉機，最好預鬆啲時間，否則香港冇法子接駁。」酒過三巡，呢位人士透露一啲我哋唔會相熟嘅故事。原來目前浦東機場已經用到幾乎爆燈，每日單係由香港、澳門、深圳、廣州飛去浦東機場嘅班機，有成一百班，集中喺朝早至深夜。舉個例，如果由朝早七點至晚上十一時，共十六小時，飛一百班，平均每九分三十秒就有一班來自珠三角嘅飛機降落浦東，即係在天空上，好多飛機在指定航道排隊到上海，川流不息。偶有阻滯咯喎，譬如中國空軍因軍事需要，將航道暫時封閉，後面就交通擠塞啦，地面上嘅航機惟有得個等字，唔敢起飛，咁咪誤班囉，使乜通知乘客。
左丁山聽到烏垂垂，唔多明，點解唔可以增加或者擴闊航道呀？印刷Ｐ畢竟跑慣大陸，立即醒悟：「係噃，中國領空，由空軍全權管制，民航總局無權過問。如果航空交通日益繁忙，民航總局話要與航空公司方便，實際上話唔到事，要問過空軍攞ＯＫ先！」呢樣乃中國國情，在上海浦東機場呆等之時，不妨學習吓。中國經濟以高速度發展，快到現有體制無法子跟得上。如果體制不改，一係經濟發展俾瓶頸箍死，一係經濟衝爆瓶頸，玻璃樽都爆埋，目前嘅大問題係瓶頸擴闊速度遠遠慢於GDP增長速度，航空就係一個好例子。