「千金難買相連戶」，一啲賣散嘅屋苑，買家若果想買相連單位，咁就要有耐性至得。 中原陳美玲話，有買家舊年買入鴨脷洲海怡半島四座一個中層H單位，但係只得七百二十呎，唔夠用，所以一直將單位放租，近日見隔籬G單位放盤，為咗要打通做相連單位，所以肯出比市價高二十萬嘅三百三十萬購得單位。 單位面向西南，可以遠眺南丫島，呢類單位令到買家相信係罕有嘅「風水屋」。況且，打通做相連單位之後，面積近一千五百呎，比起屋苑嘅原本規劃嘅大單位只得千一呎重要大，第日放盤，又值錢啲。