以避風塘炒蟹聞名的喜記，不但吸引本地食家、明星、各國遊客，成為香港一道著名的特色美食，最近還吸引到十足十韓版Boyz的Alex和阿勇這兩個韓國大男孩，食過翻尋味之後，兩人索性來港拿起鑊鏟學炒蟹，大呼「鵝地何莊耳些里道嘅臭鞋！」（我哋好鍾意食呢度嘅炒蟹）
記者：招佩珊
攝影：伍慶泉
未來外父傳授秘技
喜記從70年代在銅鑼灣避風塘炒蟹到現在，是正宗的避風塘炒蟹。店內用明星剪報當牆紙，暗地裏話你知來幫襯不乏明星，如黎明、謝霆鋒、劉德華、梁朝偉等；捧場客還包括外國遊客，採訪當晚才六點多，就坐了一枱台灣客，一枱國內客，以及一枱外籍全男班；而欣賞店內的地道美食，還有來自韓國的Alex和阿勇，但何解他們會來港學炒蟹？原來，Alex與老闆喜叔的女兒，在英國讀書時認識，之後重拍埋拖；有次喜叔女兒帶了經真空處理的炒蟹給Alex，一吃便立即愛上，而Alex有意在韓國開設餐館建立自己的事業，於是，今年便來港向未來外父喜叔學炒蟹。
與Alex相識超過10年的阿勇，用字正腔圓的廣東話說：「我鍾意煮嘢食，想做廚師。」來港之前，他已在韓國一家上海小籠包店當廚，今次一於兄弟檔上陣，齊齊來港學炒蟹，學成後諗住返韓國開番間同喜記一樣的食店。
炒蟹合拍食辣搞鬼
由劏蟹、切配料、調配秘製醬料至落鑊炒蟹，兩個都學齊晒，採訪當日就分工合作，阿勇拿刀，Alex揸鑊鏟，其間「嘰喱咕嚕」用韓文有商有量，相當合拍。見他們煮得似模似樣，而印象中韓國人頗食得辣，一於叫阿勇同Alex試幾道喜記撚手辣菜，由浸蜆開始，接着是鮮魷、炒麵，終極挑戰是炒辣蟹；事前記者話自己食得辣，叫他們炒碟大辣，實情是要他們親身試味，平時只食小辣的阿勇即時大叫：「唔係嘛！」原來，大辣炒蟹不但用辣油來炸蟹，還加入秘製辣椒乾，比小辣勁5倍，結果怎樣？他們表情多多，阿勇更被Alex整蠱，搞到旁觀的記者笑到食啖粥都嗆親。
避風塘炒辣蟹
$450/隻大Size（$250/隻細Size、$350/隻中Size）
大肉蟹來自越南，每隻至少重2斤，肉質鮮甜嫩滑，特別是兩隻肥大蟹箝，剝晒殼當正是雞髀咁扯，爽！辣度有分大、中、小，齋食蟹肉其實唔覺好辣，旁邊的蒜茸和辣椒乾才最辣；而喜記的避風塘炒蟹之所以咁出名，全賴這些如沙堆的蒜茸和辣椒乾，當中亦加有秘製醬料，喜叔話是獨門秘方唔講得，「好多客用嚟送粥送麵，重會打包拎走！」
Boyz辣味評級
阿勇：★★★★★
Alex：★★★★
最辣為5粒
★★★★★
上湯水浸大蜆$60
水浸蜆只下少少鹽、辣椒乾等調味，主要是吃它的鮮甜，蜆肉分泌出來的汁液，令湯底鮮味十足，連配料的粉絲也滲滿海鮮香。
Boyz辣味評級
阿勇：★
Alex：★
蟹油炒麵$30
用炸過蟹的油去炒麵，蟹的鮮甜、精華都滲進油裏，炒出來的麵特別香，最重要是麵身香而不油膩，加入芽菜、韭黃更覺爽口。
Boyz辣味評級
阿勇：★
Alex：★1/2★
椒鹽瀨尿蝦$180/隻
以五香粉炮製的瀨尿蝦，加了喜記獨家炮製醬料更加惹味。
Boyz辣味評級
阿勇：唔辣
Alex：唔辣
椒鹽焗鮮魷$70
炸漿夠脆，鮮魷新鮮爽滑而不韌，加上金銀蒜同椒鹽，非常香口。
Boyz辣味評級
阿勇：唔辣
Alex：1/2★
食客有Say
喜記避風塘炒辣蟹（28937565）
銅鑼灣謝斐道392號H舖地下
營業時間：12:00nn?:30am
座位：100個