香港迪士尼樂園下個月十二號開幕，地產代理界個個都憧憬，會令到經濟更加好，樂園周邊嘅樓價上升，帶嚟多啲生意，所以最近大家就爭住公布針對迪士尼嘅部署。
香港置業噚日就以揭「幸運星」嘅方法，公布一連串安排，好似印製名為《置業樂園Guide》嘅小冊子、成立迪士尼物業投資專隊等等。
佢哋將各項部署寫晒喺啲星星上面，然後由港置李志成逐一揭開，十足十以前歡樂今宵啲遊戲節目咁，揭中星星有獎。
只不過，噚日喺港置揭晒咁多粒星星，豐富巨獎就談唔上，其中一粒星星提到，幫襯佢哋嘅買家，可以獲贈迪士尼樂園入場券，都算喺小小安慰獎。