早前好闊綽咁捐咗八億畀科技大學嘅霍英東，佢嘅基金會噚日又宣布同職訓局喺南沙合作，開辦一間國際級酒店及餐飲培訓中心，名為「南沙英東旅遊學院」。正當各界以為出席簽約儀式嘅霍英東基金會副主席霍震寰，會再宣布巨額捐款之際，霍震寰同職訓局坦言，𠵱家只係簽意向書，未開始正式合作。
霍生話，收生、建校計劃要幾多錢，暫時都未計到數，遲啲先算咁話。至於會唔會再捐錢畀本港嘅大學，霍震寰好老實咁講，除咗科大之外，基金會都唔打算捐錢畀大學。唔知其他大學校長聽到，會唔會好失望呢？
傳真︰2623-9278
電郵︰[email protected]