過去周末連日暴雨，搞到好多預約都臨時縮沙，但係祥益地產董事謝澤銘話，屯門悅湖山莊係少有嘅異數，淨係噚日一日，就有四宗成交，其中兩宗係業主大減價出貨㖭。 悅湖山莊九座中層G室，業主五月中放盤，叫價一百三十五萬，然後逐步降低，到日前終於以一百零八萬八千售出，累積減幅近兩成。 另外，七座中層J室，業主四月以一百零五萬放盤，嗰個月中減至一百萬，之後就一直唔肯再減，到八月初，眼見市道愈趨淡靜，先至肯減到九十二萬，日前又再多減兩萬，件貨先能夠脫手，四個月以嚟，減價幅度超過一成四。