近日多隻細價股異動，東成（735）及金屬電子交易所（8161）場面非常熱鬧。噚日輪到中盈控股（766）發威，勁升24.7％，收0.53元，成交3805萬元。
經紀陳話，中盈上個月出咗一批輪，之後隻股連升幾日，由0.20元炒到上0.52元高位，靜完一輪又再發力。江湖傳聞中盈發展天然資源的投資有眉目，另外亦有傳聞話，因為有人批輪已經到手，可以行使認購。呢批輪行使價只係0.19元，加埋認購成本1仙，認購人帳面已經勁賺。
另外，工業股中亦有個別股份異動，就係產銷波鞋嘅新灃集團（1223），但異動嘅唔係正股，而係供股嘅威士（2900），日日都見到有大行出嚟密密收貨。經紀黃話，聽講有人計過條數，覺得供股有着數。
新灃今次2供1，供股價0.63元，集資3.5億元。隻股過往業績良好，持有現金近3億銀，無端白事搞供股，大股東又同時出任包銷商，令市場覺得有低價收貨之嫌，所以有投資者決定二仔底死跟。
新灃昨日跌2.46%，收1.19元。
慕容小初