譚詠麟（阿倫）今日五十五歲生日，噚日佢喺紅館綵排個唱，全部人畀咗個驚喜佢，提早同佢慶祝生日，搞到佢不知幾開心。阿倫話生日願望係「演唱會成功」、「唱片賣得好」同埋「香港乜都好」。佢前日已經同班老友曾志偉、陳百祥等慶祝咗㖭。
同家人慶祝
馮仁昭問阿倫會唔會同屋企人慶祝，或者再帶個仔去睇戲，阿倫講笑咁話：「我以後轉去上水睇戲囉！」阿倫重話收到好多來自世界各地嘅歌迷寄生日卡畀佢，其中一個歌迷重係好細個嘅，唔知阿倫重有冇收到其他小朋友送嘅禮物，同埋屋企人有冇送禮？佢話：「哈哈！總之屋企人有送啦，生日前送囉！」
阿倫一邊食醉雞翼，一邊話自己好易講真心話，對於之前俾本報影到佢一家三口去數碼港睇戲，阿倫話：「作為資深藝人，我好珍惜同傳媒嘅關係，呢幾年有好多嘢，我明白記者嘅責任，我覺得大家要互相體諒。」
另外，阿倫重即場排舞，同個女dancer攬腰跳辣舞，阿倫重講笑話：「我勁過阿Rain呀！我係Rain麟。」