龍傳基金舉辦第三屆「龍匯100」華人青年領袖論壇，噚日喺香港揭幕，來自二十個國家嘅五百名華人青年申請參加，從中挑選咗一百位精英出席。呢個活動為期九日，頭四日喺香港；尾五日喺上海。出席揭幕禮嘅香港總商會總裁翁以登，教導班後生仔點樣喺中國做生意；之後嚟緊幾日，啲後生仔會參觀立法會、高等法院、滙豐、貨櫃碼頭同埋科技園等等，跟住就飛去上海。
龍傳基金主席楊鐵樑，除咗勸勉年輕一代努力發奮，席間重講到早前吳光正Peter話以後唔選特首單嘢，楊官竟然話「幾好、幾得意呀」，呢句說話真係可圈可點，莫非楊官言下之意，係話Peter唔去同煲呔硬碰，其實係明智之舉？
八方睇見楊官𠵱家逍遙自在，諗番如果當初楊官真係贏咗董生，又點享有咁悠閒生活，得閒教吓學生英文，得閒又可以教吓佢哋社交禮儀。如果Peter重想生活舒適啲，係咪都應該以楊官為人辦呢？
傳真︰2623-9278
電郵︰[email protected]