個市盪盪吓，呢鋪盪上，恒指回升180點，最差嗰陣都有12點進帳。中移動（941）、滙控（005）與中海油（883），總共拉高恒指133點。重磅藍籌股頂得住，個市有得玩。
中銀C輪3641：中銀（2388）派完中期成績表後散過一輪，上周四最低15.40元，大行𠵱家又唱好，昨收15.85元，單日升15仙。現價同上周一高價16.95元比較重相差1.10元，短期重有幾毫子上升水位。中銀C輪個別昨日已對正股回升有唔錯反應，最勁嘅係9321，收69仙，彈升13%，唔係乾煎，有20球易手，係第2大成交金額嘅中銀C輪。第4熱門嘅3641，收17仙，只升得1格，未跟貼正股，夠晒長命，短炒就博呢隻。4日前最高25.5仙散落嚟，𠵱家上車炒，水位好大。
滙控C輪9026：滙控養眼，升80仙，最威嘅C輪3965，彈升26%。隻輪下月26日最後交易，溢價重有3.3%，追唔過。滙控C輪9026嘅對沖值係57%，按正股升80仙計，輪價應升4.6仙，但實際只升得2仙，收56仙，買得過。隻輪明年4月夠鐘，溢價2.8%，槓桿率22.7倍（有效13倍），引伸波幅12%，數據正到痹。
章盛