咪睇煲呔貴人事忙，原來佢都有個幾好嘅習慣，就係每逢傍晚六點左右，都會喺維多利亞宮官邸個泳池游幾圈，等自己精神啲同健康啲，然之後先會出席各式各樣嘅晚宴應酬。
不過，煲呔第時搬咗入禮賓府之後，就唔可以再碧波暢泳喇，點解會咁？之唔係禮賓府坐落於中半山一個好開揚嘅地方，四周圍都冇遮冇掩，如果煲呔喺度游嚟游去，簡直係全天候任狗仔隊任影唔嬲，煲呔自己都話好驚，因為嗰度可能有成幾千人望住自己，個人最擔心係個大肚腩無所遁形，又或者邊度整親、邊度有啲奇怪，都會一一現於人前，所以佢話到時都應該唔會游水，呢樣嘢怕且都算係佢搬入禮賓府嘅一大犧牲。煲呔或者可以考慮吓，除咗起錦鯉池，重可以起番個室內泳池噃。
傳真︰2623-9278
電郵︰[email protected]