上周五，美股高開低收，但指數仍然冇乜事，杜指仍有4點進帳，油價則反覆上到高位埋單。港股經周四與周五共散411點後，估計萬五點短期內可先守一守。
中石油C輪3500：中石油（857）過去3日散11%。上周五紐約期油彈番上去，美國大隻油股，隻隻升。中石油ADR都係跌，但折合本港H股為6.38元，高過本港少少。
中石油如果再低一啲，博反彈，搵C輪埋手，隻3500諗得吓，明年2月尾夠鐘，輪價68仙，溢價6%，槓桿率9.3倍（有效5.9倍），引伸波幅29.6%。如果唔想升跌幅太大，則揀好遠期（明年10月）嘅4779。
國壽C輪3966：國壽（2628）近期相對硬淨，睇淡嘅睇法係冇乜跌過，要跌。睇好嘅睇法則係既然硬淨，大市如果雨過天青，國壽就會跑贏大市。如果係抱住後者睇法，揀C輪3966炒，但注碼真係要克制。正股隨時郁兩毫子，睇落唔算多，但隻輪已經有3成變化，睇錯方向，輸起上嚟都好傷。
章盛