澳門特首何厚鏵上任後主力發展當地歷史悠久嘅博彩業，一招開放賭權，引入美國拉斯維加斯集團等外國投資者，外資經營嘅金沙賭場開幕後，澳門嘅經濟就好似火箭咁不斷往上飛，𠵱家喺市面要截架的士都唔係咁易嘅事。不過，美國拉斯維加斯集團主席BillWeidner日前接受《金融時報》訪問時就承認，查實金沙賭場喺設計期間都問過風水師意見，唔敢唔信邪。
查實澳門賭場擺風水陣，可以話係傳統上絕不缺少嘅一環，好似葡京賭場設計形似一個鳥籠等傳說大家都聽唔少。入鄉隨俗，BillWeidner透露，喺籌備金沙嘅時候，都特登搵咗一位老友、任職迪士尼樂園設計部門嘅頭目幫手，介紹個風水師畀吓意見。
BillWeidner話，位風水大師對金沙賭場大堂嘅設計及角度最有意見，佢話原來設計好似一個漏斗咁，過濾晒賭場嘅好運，重沖晒出去外面嘅大海。於是風水師就建議咗現時呢個圓形狀嘅大門設計，做到好似一個圓圓嘅蜂巢咁，留住晒賭場裹面嘅蜜糖。
拒絕透露風水大師係邊位
事實上，金沙只係拉斯維加斯集團進軍澳門嘅第一步，預期喺○七年開幕嘅氹仔旅遊度假村計劃，投資更涉及超過十億港元，BillWeidner當然要再搵風水大師獻計啦，點知風水大師否決咗佢哋原來嘅設計，重建議佢哋一定要加建一啲連接海邊嘅運河建築，靈唔靈就真係到時先知啦。
講咗咁多，到底幕後向拉斯維加斯集團獻計嘅呢位風水大師係邊位？BillWeidner就話呢個係商業秘密，拒絕透露風水大師係何方神聖。
傳真︰2623-9278
電郵︰[email protected]