候選亞姐嘅五日四夜西安親善之旅噚日結束，離開西安前，亞視重特登喺前晚搞咗個選舉活動，選出「親善小姐」同「最受傳媒歡迎獎」佳麗，結果特區賽區3號袁詩媛同內地賽區9號朱莉齊齊獲得「最受傳媒歡迎獎」，而由特區賽區同內地賽區互選嘅「親善小姐」，就由特區賽區9號陳詩敏同內地賽區1號王識博奪得。
學歷贏晒
之前朱莉因為唔習慣着三點式泳衣見人而偷偷落淚，但前晚佢攞到獎，亦一樣眼濕濕，朱莉話：「我很愛哭，開心時會哭，不開心也會哭！」既然咁驚着三點式見人，咁點解重要參選？朱莉就解釋話自己都只係抱住試吓嘅心態。其實朱莉目前喺吉林大學經濟學院讀緊博士，學歷係成班女仔中最高嘅一個，就算唔參加選美都大把前途啦！
