九倉大老闆吳光正最近三番四次表達佢唔會再參選特首，所謂兵不厭詐，但係八方知道連楊啟彥最近都同佢說再見，又開始信吳光正真係冇心戀戰，莫非中央有指示？
話說楊啟彥離開九鐵之後，吳光正禮賢下士，叫佢加入九倉做交通顧問，當時楊啟彥見佢盛意拳拳，雖然明知佢大把人幫手，都答應咗，每個星期返幾日工，之後楊啟彥抱恙要北上醫病，冇咁多時間做顧問工作，到最近，吳光正忽然抽身而出，公開話唔會同煲呔爭，於是楊官知道留低嘅意義不大，所以就同吳光正辭職。八方聽聞，吳光正已經同意放人，雙方已再冇賓主關係。
楊啟彥係港英年代嘅精英，卻不為肥彭重用，吳光正若有心問鼎特首，當然要囊括所有叻人，但係佢忽然改變計劃，究竟係乜嘢原因，八方都好想知道。
至於楊官，聽講換腎手術十分成功，佢早前喺北京醫病，算係保住條命仔，𠵱家人就瘦咗好多，由大碼變細碼，不過狀態甚佳，佢同人話以後食番多啲肥番啲，應該可以回復當年勇。楊官都算好彩，個病喺退下九鐵火線先出現，有一派人話有工作狂嘅人，一冇嘢做就會病，佢可能係呢種。
傳真︰2623-9278
電郵︰[email protected]