話說政務司司長肥龍許仕仁最近頻頻見政界人士傾政改方案，白鴿黨楊森唔知係咪贈興，竟然提醒肥龍唔好低估港人對民主嘅訴求，如果政改方案太保守，又冇時間表路線圖，難保香港人唔會好似○三年反二十三條咁上街遊行，以示不滿。
楊森肯定係靠嚇，因為最近幾次上街嘅人數冇法同前一兩年嘅7.1比較。但係，佢咁講都唔係簡單，因為上街遊行肯定係煲呔同肥龍死穴，當年老董都係死於群眾力量，煲呔唔會唔知死，加上煲呔後台曾慶紅副主席即將駕臨，煲呔梗係唔想有任何遊行活動，令佢喺副主席面前丟架。
當然今時唔同往日，經濟好咗，政改未出台，新政府重係蜜月期，好難會叫到成千上萬人上街，但係民意難保不變，煲呔都係小心為上。
傳真︰2623-9278
電郵︰[email protected]