香港話劇團套《新傾城之戀》前晚喺演藝學院首映，重有個酒會，都好熱鬧。記憶所及，今次已經係香港話劇團第三次做呢套張愛玲嘅經典。第一次睇之時，八方重後生，女主角應該係移咗民嘅區嘉雯。三年前，由毛俊輝執導，搵咗蘇玉華做白流蘇，劉雅麗幕後代唱，都幾好睇。今趟，毛俊輝再執導，重搵多個梁家輝嚟做范柳原，對普羅大眾應更有吸引力。另外，許鞍華亦都拍過電影版，男女主角係周潤發同繆騫人。
呢套劇，有香港背景，講白流蘇嫁來港遇正日軍打太平洋戰爭攻陷香港。啱啱今年係日本投降六十周年，又係張愛玲逝世十周年，重演有特別意義。另一個特別意義，就係劇團搵到信和呢個大地產商贊助。西九龍文娛藝術這個大項目，信和都係競投財團之一。因為呢個項目，個個大地產商都忽然文化起嚟，好慷慨咁付贊助費，以前就冇呢支歌唱。
傳真︰2623-9278
電郵︰[email protected]