韓國人氣歌手Rain十月來港舉行兩場演唱會，門票下月初始公開發售，但內部認購已超額幾倍，主辦單位聲明絕不加場。今次Rain來港開騷，將以他年初在韓國舉行的處男個唱為藍本，Rain在個唱中除狂晒肌肉外，又請歌迷上台營造浪漫，相信香港fans看過這些精采場面後，瞓幾日街都要撲飛入場。
憑韓劇《浪漫滿屋》打動萬千香港女fans的男歌手Rain，將於十月八、九日在香港會展中心舉行兩場演唱會，雖然門票仍未開始發售，但內部認購十分踴躍，主辦單位亦努力爭取加場，但因Rain在韓國的工作排得密麻麻，故其經理人早已拒絕加場，連主辦單位邀請Rain下月來港宣傳個唱，亦因他太忙而取消，不過主辦單位仍會繼續游說Rain加場。
優待港日
下月東京舉行個唱
Rain的香港代理人陳家瑛近日積極籌備其十月個唱，票價方面，最高為五百八十元，最低約一百三十元，昨日陳家瑛接受電話訪問時說：「阿Rain真係好勁，兩場個唱嘅內部認購已經超出幾倍，我哋根本唔夠飛分畀人，因為部份飛要公開發售，到時我哋都要搵人去排隊買飛，應付內部認購嘅數額。今次反應咁好，其實我都同韓國嗰邊反映過，睇吓可唔可以加多一場，但嗰邊話阿Rain真係好忙，台灣、星馬同內地都有好多主辦商搵佢開演唱會，但佢𠵱家只係答應去日本同香港唱。」
下月二、三日Rain會在東京的日本武道館舉行兩場演唱會，兩萬張門票甫開賣，半天內便全部售罄，而Rain的香港個唱門票預計在下月初發售。
其實Rain十月在港舉行的個唱，將以他今年一月在韓國舉行的「RainyDay」演唱會為藍本，此演唱會最近推出韓版DVD，收錄他在演唱會中勁歌熱舞的精采表演，除拍得Rain經常面帶微笑及伸脷等小動作外，他更大騷肌肉，其中露點淋水濕身一幕更令在場fans熱血沸騰，還有一場女舞蹈員撫摸赤裸上身的阿Rain，意識頗為大膽。
Rain在演唱會上更大冧fans說：「我等待一位女孩來臨，可以嗎？」之後便選了一名女歌迷上台，向着她大唱情歌之餘，還送上熊公仔、鮮花及戒指，令全場歌迷嘩聲四起，看完以上精采內容，香港fans勢必瞓身撲飛，希望成為台上的幸運歌迷。
公開發售
籲歌迷勿網上炒飛
「RainyDay」演唱會韓版DVD兩張分別收錄了個唱中的十七首歌、花絮、影集及綵排片段等，隨碟加送書冊、四十頁寫真集、十張即影即有照片及收錄四首混音版作品的BonusCD一張，fans未知能否撲到飛，大可率先欣賞Rain在韓國的表演止渴。
對於Rain個唱門票勢掀撲飛熱潮，陳家瑛昨日說：「相信今次會有好多歌迷爭住去買，不過聽聞有網上炒飛嘅情況發生，我希望歌迷唔好受騙，Rain嘅飛會公開發售，歌迷到時可以去法定嘅售票處買飛。」
採訪：陳月媚
