今日二十二號，再過三個禮拜，香港迪士尼就開幕，八方早前寫過副主席曾慶紅會南下做主禮嘉賓，兼且嚟挺一挺佢位同宗，等佢唔使睇地方官白眼，豬又死時鱔又死。另外好多做旅遊、零售嘅生意人都等緊呢個日子，希望迪士尼效應可以刺激生意；甚至股市都有人摩拳擦掌，諗住借個概念搵多少。
至於迪士尼自己就更緊張，𠵱家已俾人試玩。公司夥計、合作夥伴，甚至有啲關係嘅人都有免費飛。最可惜呢幾日天不造美，日日落大雨，搞到啲「優先」遊客冇晒癮，未睇煙花就返歸。八方有個老友噚日去玩，佢話食嘢唔貴，啲禮物好多人買，職員訓練得幾好，但遊戲只啱十歲樓下嘅小朋友，唯一可以畀大人玩嘅只有太空山，唔怪得八十歲阿伯都去冒險。整體講，個樂園太細喇。唔知阿董生同阿曾生有冇咁嘅感覺呢？
傳真︰2623-9278
電郵︰[email protected]