（一）八月十一日本欄談及Esquire（Electronics）vs滙豐銀行及滙豐物業（WayfoongProperty）之案件，好多讀者來電郵問點樣先至可以在網上下載法官判詞，Terence與Donald兩位更加話佢哋上網冇法子搵得到。
左丁山位秘書下載咗，上面印住嘅網址係：http://legalref.judiciary.gov.hk/lrs/common/search/search.jsp，請各位有興趣嘅，試吓再上網去搵。可以講畀大家聽，判詞十分有趣，有批判性，從事銀行按揭業務，以樓宇作抵押攞所謂generalbankingfacilities嘅人士，不可不讀，律師與法律系學生更加要深入研究㖭啦。判詞談及TheLawonFiduciaryDuty、TheLawonEconomicDuress、關祖堯律師樓、孖士打律師樓、何善衡家族、滙豐銀行、美國銀行、原訴人及一九八七年滙豐高層雷興悟（Wrangham，總經理）及PaulSelway-Swift等等等，有心機睇完嘅話，嗒落有味。
（二）一位讀者Bergman問睇亞當史密之《原富論》，要睇原裝正版。《原富論》版本甚多，多到數唔晒，左丁山問一位芝加哥大學經濟學系三年班學生，佢話所有美加學生都係讀芝加哥大學出版之EdwinCannan編輯之一九○四年版本，長1152頁，Bergman不妨參考。
（三）上星期日本欄談及《媽咪餵人奶》，引來熱烈反應。Terence話佢太太親自餵女兒九個月，效果良好，佢個女喺瑪嘉烈醫院出世，護士態度好好，知道佢太太要決定餵人奶之後，態度更好，親切到不得了，因為呢間醫院極力推廣餵人奶（breastfeeding）。一位母乳媽媽Snoopy來電郵話餵奶令母嬰嘅關係更密切，更有安全感，佢個孩子已經十五個月大，甚為健康，如果懷孕媽媽想知道多啲母乳育嬰，可以上網www.baby-kingdom.com，分享他人經驗。