政改方案未出台，特區政府已經打定輸數，鄔維庸更大唱反調，話贊成原地踏步，反正香港人都未掂云云，鄔醫生素來語不驚人死不休，當年就叫過香港人食狗餅；佢咁講為政府打定退堂鼓，到時乜都冇，唔會咁大震撼。
八方都請教過一啲識小小法律嘅人，佢哋話，要告政府原地踏步，違反基本法循序漸進嘅精神比較難，皆因有個修改附件一同二嘅機制，如果三方中一方冇法通過，今次可能係立法會，咁想行一小步都冇法，唔可以話政府違反承諾。當然你話冇法告得入，但係北京仍然怕領匯翻版，因為一有人尋求司法覆核，就要由李國能發落。
重有，有人諗住加晒四百個區議員入選委會就掂，點知班商界唔肯，話政界如果加咁多，其他三個界別都要照加先公平，即係個選委會要過二千人，咁肯定比政府構想嘅大好多，冇可能。
傳真︰2623-9278
電郵︰[email protected]