亞視女星張文慈（Pinky），出道時曾贏得亞洲小姐的最完美體態獎，向Pinky請教KeepFit之道當然是最佳人選，誰知這位性感女星最愛打泰拳，她說：「泰拳唔單止可以收身，玩得耐重俾到我好多做人道理。」
文：李勇明
圖：黃冠華
近年泰拳熱潮可謂橫掃全港，城中不少名人明星都是它的捧場客。自從連鎖式健身中心加設泰拳班後，這股熱潮更一發不可收拾；上至四、五十歲的家庭主婦，下至十多歲的學生，紛紛帶上拳套打個痛快。Pinky說：「開始打泰拳記得喺兩年幾前，當時睇過呂頌賢主演嘅《拳王》，覺得泰拳嘅動作幾有型，於是就叫阿呂介紹我嚟呢度玩。」
打拳悟出做人道理
「最初玩嘅時候遇正沙士期，成個香港怨氣好重，加上自己當時嘅事業唔係咁順利，諗住打拳可以減吓壓，點知一玩上癮。最激嘅時期我每個星期玩三、四晚，每次至少兩個鐘。」
可能是日子有功，Pinky多年來的身形長期保持至fit狀態，她說：「練拳除咗可以KeepFit同保護自己外，泰拳其實重可以俾我悟出好多做人嘅道理。首先，打拳一定唔可以急躁，每次出拳都要睇準機會，就好似做人要有耐性一樣；其次，打拳要知道自己優點同對手弱點，知己知彼先可以百戰百勝，道理同做人處事一樣。」
睡前6小時不進食
可能近期忙於為亞視新劇《情陷夜中環》試造型關係，Pinky接受訪問當天碰巧身體不適；不過，當她換上一身泰拳裝束、手戴拳套準備拍照時，Pinky即時「醒神」，更拉着拳館內的教練對打、踢沙包、操器械，練習大汗淋漓亦面不改容。「除咗打拳，其實我重鍾意滑水、跑步呢啲帶氧運動。至於飲食方面，我樣樣嘢都食，冇乜話節制唔節制。不過瞓覺前六個鐘就一定唔食嘢，平時就多飲水、多食生果，呢啲咁普通嘅飲食心得，我諗個個人都識啩。」
