【本報訊】含致命惡病的食品一浪接一浪，攻陷街巿不同區域，一度躍升為健康首選的魚兒也不能幸免，慘被捲入「孔雀石綠」的漩渦之中，不單魚販叫苦連天，就是縱橫街巿三十年的主婦也慨歎陷入史上「最難買餸嘅時期」，既要捍衞家庭成員的健康，又要抵受挑剔家人的責難，惟有盡力而為，嘗試「把罐頭當上菜」。有營養師建議巿民，進食黃豆製品及全穀食品等補充營養。 記者：張嘉雯、蔡建豪、王慧珊
自言縱橫街巿三十年的盧太一家都愛吃魚，特別是鯇魚及紅衫魚，昨日「一覺醒來無魚食」，猶如晴天霹靂，「今日話禁都驚有事，惟有暫停食，過幾日先……𠵱家唔敢買，過幾日先算，買咗屋企人都唔敢食。」她慨歎豬、雞、牛、魚「相繼出事」，「已經唔知食乜好，惟有食啲穩陣嘅食物，好似瓜、菜，𠵱家禽流感好似無乜，可以食番雞。」她又說，食物會煮熟啲，又會以罐頭「頂檔」。
鹹水魚趁機減價促銷
「冇買到魚，我諗魚肉嘅問題唔係好大啩。」為避過孔雀石綠的魔爪，主婦黃太昨只買了手打魚肉，「豬肉會買少啲，買冰鮮雞翼，細路仔鍾意食，又無事發生過，樣樣都唔買得真係好為難，做家庭主婦真係好為難，惟有盡量買。」
記者所見，昨日淡水魚檔人少魚更少，但價格並無下降，劏好的鯇魚由平日每份七元升至每份十元，相反鹹水魚及冰鮮魚則減價促銷，引來巿民搶購；亦有主婦趁未太貴，購入活蝦作餸。
每天給家中孩子煮粥的劉太，昨日無懼惡毒，用了數十元買了一尾鯇魚，「我日日都煲粥，無魚真係好難為，買餸唔知買乜好，惟有轉用鹹水魚，好似黃花魚咁，本來諗住豬肉開始無問題，又輪到魚，一浪接一浪。」
外表太靚貨色不安全
專營大閘蟹多年的上海老三陽負責人祁玉鳳，從事水產、南貨業數年，已戒吃內地的大魚、鰻魚和桂花魚，而豬肉脂肪少於半吋她都不會購買，「經驗話畀我知，天然嘢冇理由會咁大條，咁靚。」。她批評部份內地人製作食物「絕對冇道德」，她已不敢買入外表「太靚」的貨色。
她又指，內地有毒食品已隨着「自由行」悄悄湧入本港，自去年起，不少以自由行身份來港的內地人到處推銷大閘蟹、金華火腿等食品，但大閘蟹品質差，也不知是否「毒蟹」，部份金華火腿更被發現是過期劣質貨。
以黃豆穀類補充營養
怡生營養顧問註冊營養師劉立儀表示，若巿民擔心豬肉及魚肉安全，可以改吃牛肉、雞肉或黃豆製品，「好似豆腐、豆乾、腐皮、枝竹、雞蛋咁，都有好好嘅蛋白質，或者飲牛奶、豆漿都得，短時間係無問題。」她又指出，豬肉含豐富維他命B，巿民可進食菠菜或全穀類，如糙米、麥皮等補充。
