賣電視機顯像管的彩虹電子（438），上市以來有唔少負面消息，令到股價一浪低於一浪，以招股價1.58元計，累積跌幅最多達75％。隻股即將在本周四公布中期業績，之前彩虹講明旗下在上海上市的A股彩虹顯示器將錄得虧損，預期彩虹業績亦會受影響，但呢一排竟然見到股價有明顯反彈，認真令人嘖嘖稱奇。
經紀陳話，彩虹去年年底上市，就遇上客戶創維（751）老闆被拉事件，令彩虹一上市就潛水，股價一路係咁跌，加上附屬公司將錄得虧損，令股價最低跌到0.335元，上市初買落的芬佬真係輸到一殼眼淚，好似細摩咁，喺7月底曾以3毫零子沽貨，令持股量低於5％。
但與此同時，有人就持相反理論，話彩虹成立多年，擁有一定實力，只因為行業不景氣影響，以及唔好彩遇上負面消息，先至會搞到股價咁肉酸。彩虹資產值有成30億銀咁多，家陣市值先得幾億銀，實在唔對稱，可以扒冷博反彈。
彩虹上周五升7.23％，收0.445元，成交股數2206萬股，金額905萬元。
慕容小初