聯合地產（056）物業資產幾乎件件筍嘢，隱藏資產值又豐厚，再跌收集。聯地NAV10.83元，現價（4.575元）折讓近58%，唔係貴，家陣聯地應該透過共同控制體AlliedKajima（50%權益），揸住告士打道聯合鹿島大廈及謝斐道世紀香港酒店兩幢物業，總面積51.2萬平方呎。05年度（3月止）AlliedKajima非流動資產值24.34億銀，籠統計數，物業呎價4750蚊咁大把，已經低過同區商廈6字頭叫價。商廈火熱，未來日子，呎價上到7000蚊有可能，單係呢兩幢物業潛在估值36億銀，聯地應佔權益高達18億銀，家陣聯地市值亦不過24.5億銀！
聯地其餘大潭道、山頂、紅山半島、地利根德徑等逾10萬方呎住宅物業、灣仔17萬方呎中國網絡中心，及荃灣750萬方呎貨運中心，都未重新秤過。再講，聯地喺花旗德州擁地盤面積1388萬平方米項目，呢壇製作，聯想空間非常豐富。隻股再有調整，落到4蚊可以首注吸納，市道火熱，聯地挨近未重估前NAV10蚊，好肥仔。
力華醞釀突破
力寶華潤（156）重返今年頭密集區水位，醞釀突破，可以昅昅，又講兩點：第一，力寶華潤阿仔華人銀行（655）呢期話斥資最多14.5億銀，透過LAAP投資東亞地區房地產，呢壇製作出街，市場對力寶系私有化憧憬幻滅，但換個角度睇，成系由現金牛公司轉而積極，感覺上係搞活多過靜態被動。第二，力寶華潤NAV0.51元，現價（0.169元）折讓67%，折讓重係好大，短線問題唔大。吼實隻股，回落到0.16元呢個星期橫行底，可以一試，突破0.178元，應該可以上試2月高位0.193元。
錢雋