上市公司股東會揀地點，有時都幾有指標性。好似近日四海國際咁，原定九月八日喺中環開股東周年大會，但近日突然向股東發出通知，話要將地點改喺屯門黃金海岸酒店，所以要將股東會改期，延至九月二十六日，重要係朝早九點舉行，除非你住喺屯門，否則可能要天未光就起身。
有小股東對此好不滿，特登同八方訴苦，話公司冇交通安排，佢質疑公司可能因為舊年純利大跌六成七，驚俾人質疑，所以唔想方便股東出席；佢又曾經打電話去問公司點解要改到咁遠開股東會，但職員支吾以對，話負責人唔喺度。四海國際呢間公司原本系出名門，係何鴻章創立，早幾年已出讓控股權，何現時重揸住接近一成嘅股權，唔知到時股東會，佢會唔會現身呢？
爆料熱線：29290000、27860099
報料傳真：26239278
報料電郵：[email protected]