英皇老闆楊受成喺澳門間英皇娛樂酒店，揀喺星期四同澳門電訊舉行簽約儀式，為隆重其事，楊生請咗賭王何鴻燊同成龍做嘉賓，重廣邀香港傳媒出席。本來咁嘅陣容，啱晒娛樂版行家，點知八方收到佢哋公關嘅電話，話英皇想邀請財經行家出席。
八方對中國曆法冇乜研究，但今個禮拜四肯定係好日子，除咗英皇，超人李嘉誠嘅上市旗艦：長實同和黃都喺嗰日公布業績，同一日公布業績嘅重有太子榮智健嘅中信泰富，同大陸電訊股中國聯通。嗰日各家報館嘅財經版記者，唔使問都要全線出動，重點分身「過大海」呢？尤其上星期市場盛傳超人入院，大家當然期待禮拜四長和系業績記者會，見吓超人現身啦，所以今次賭王嘅號召力似乎唔夠超人喇。
咁都未算墟冚，因為嗰日除咗楊生請財記過大海，重有兩間上市公司請財記返大陸，安德利果汁去煙台睇廠，蒙牛就請財記去蒙古草原，感受風吹草低見牛羊嘅大自然氣息。不過，楊生唔使驚冇人捧佢場，至低限度佢旗下嘅《新報》一定會派人出席。
爆料熱線：29290000、27860099
報料傳真：26239278
報料電郵：[email protected]