邱德根（右圖）重係遠東發展嘅主席兼執行董事，但已經退居幕後，由個仔邱達昌負責。前日股東大會，邱德根雖然有到場，但記者會由個仔應付。話說有個小股東問：「你吔有咁多間酒店，又賺咁多錢，點解唔去酒店開會？」邱達昌立即答應：明年喺麗都開會。個仔做事反應咁快，唔單只邱德根感到欣慰，小股東亦應會開心。