今個星期新返咗兩隻由漫畫改編嘅電影——《頭文字D》同埋《罪惡城（SINCITY）》，前者係改編日本漫畫，後者就係改編美國漫畫，雖然兩部戲嘅風格好唔同，但係聽舖頭講兩隻DVD都非常好賣，尤其是送大量非賣品嘅《頭文字D》特別版，大家如果唔想錯過呢套限量版DVD，就好趁住呢個周末去買喇！
記者：梁瑋瑜
大家都知道《頭文字D》係一套非常受歡迎嘅同名漫畫改編，作者係重野秀一，其實「頭文字」意思係字首（Initial）咁解，而呢個D字係代表Drift，亦即係飄移，喺漫畫裏面要畫出呢個高技巧嘅駕駛技術難度有限，但係要用真人真車拍出嚟，就真係幾考功夫，喺電影裏面無論係真正飄移技巧到剪接都表現得非常出色，令到戲中數個鬥車場面都相當精采，就算之前入過戲院睇嘅都好值得買番隻碟再捧場。至於劇情方面，電影要喺短短兩個鐘頭裏面將二十幾集漫畫內容做晒出嚟，始終要有好多取捨，而呢套電影版表現就不過不失咁啦。
限量版Boxset物有所值
故事講述藤原豆腐店店長文太藉住每日叫佢個仔拓海送豆腐而喺秋名山練得能人所不能嘅飄移技巧，一次機會俾一班秋名山車手發現咗拓海呢個天才，個個都爭住同佢鬥車，而拓海就贏晒所有車手，後來重決定加入車隊。電影要拍得似原著，選角方面都好重要，今次起用咗周杰倫飾演藤原拓海，外面嘅口碑都係好壞參半啦，演技呢啲嘢一向都好主觀嘅，記者就比較欣賞余文樂同陳冠希嘅演技喇。今次嘅特別版Boxset裏面有一副砌圖、寫真集、貼紙、書籤同埋證書，用$238買嚟珍藏絕對係物有所值，尤其是幾十頁嘅寫真集製作超精美，絕對係Fans必儲Item！DVD裏面又有BonusFeature，除咗一般製作特輯、人物訪問，重有上海賽車場飄移表演，好正呀！
DVDBonus
《罪惡城》暴力加血腥
另一套就由美國大師FrankMiller編製嘅漫畫改編、曾經參展法國康城影展嘅《罪惡城》，呢套三級電影血腥味十足，而且拍攝手法十分有特色，全片都係黑白色，除咗做到忠於原著之外，重可以營造到一個充滿罪惡城市嘅氣氛，睇起上嚟都更加投入，而去到一啲有血腥嘅暴力場面，啲血又會以紅色出現，令到血腥嘅味道更加突出。
一碟四封面
電影版包括原著《TheHardGoodbye》、《TheBigFatKill》和《ThatYellowBastard》三部漫畫，全部都係關於一啲江湖恩怨仇殺故事，奉勸細膽嘅人真係唔好睇呀！今次隻DVD除咗有本記事簿送，重有四個唔同封面俾你揀，畀個貼士大家，本簿係用JESSICA做封面嘅，所以揀碟嘅時候最好就揀另外嗰三個，咁咪變相可以儲齊兩個封面囉。
查詢：DVDPro(23326326)旺角奶路臣街6E德發商場地庫B4舖
