林子祥（阿Lam）將會接老婆葉蒨文棒簽約英皇唱片三年，頭炮是十一月在紅館舉行的三十周年紀念演唱會，更已得到徐小鳳投桃報李答應做嘉賓，明年年初阿Lam又會推出唱片，同時亦會接拍電影，一於全面搏殺搵真銀。
老牌歌手許冠傑、徐小鳳早前的演唱會大受觀眾追捧，有見及此，今年入行三十周年、年屆五十七歲的林子祥，亦將會全力出擊再戰樂壇，據知今次是英皇老闆楊受成親自出面邀請阿Lam加盟，而他的老婆葉蒨文（Sally）和英皇旗下的MusicIcon約滿後，即由阿Lam頂上和MusicIcon簽約三年，實行兩公婆接力搵真銀。
徐小鳳任嘉賓
阿Lam的頭炮演出是十一月十七號至十九號在紅館舉行的三十周年紀念演唱會，據知阿Lam每場歌酬六十萬，三場穩袋一百八十萬，阿Lam對今次演唱會的製作十分重視，亦會邀請好友做嘉賓，早前他替徐小鳳演唱會撐場，據知小鳳姐亦禮尚往來，已答應擔任他的演唱會嘉賓。
除了演唱會外，阿Lam和MusicIcon簽下的三年唱片賣身契，初步計劃於明年年初推出全新個人大碟，全力出擊再戰樂壇，同時阿Lam亦會繼續拍戲，進入全面搏殺期。
合作開有信心
對於阿Lam加盟一事，英皇唱片部高層林偉漢昨日在電話中回應說：「我哋係傾緊阿Lam三十周年嘅演唱會，正在努力洽商中，佢係老闆嘅好朋友，而Sally之前又係我哋嘅Artist，大家合作開有信心，至於出唱片，最快都要明年年初。」問Sally是否不再續約，林偉漢說：「有嘢做我哋會繼續合作，我哋一路以嚟都合作愉快。」
採訪：朱倬誼
