佘詩曼與陳浩民拍拖已是公開的秘密，雖然男方緋聞傳個不休，但她仍充滿信心，表示不能以緋聞數量來衡量男友是否專一，反之更稱讚陳浩民是個理想結婚對象。而當時機成熟，她決定要一生一世和「他」在一起時，便會離開水銀燈下的星光日子，叠埋心水嫁人生仔去。
愛情篇：錢不是萬能
佘詩曼近年不斷接拍電視劇，荷包一年比一年重，但體重卻一年比一年輕。訪問當天，她穿着加細碼衣裳現身，纖瘦得我見猶憐。
入行後的「八年抗戰」中，她拍過二十二套電視劇，基本上阿佘一年之中沒有多少天是可以完全放鬆休息的，到底要拍到哪一天才會停下來？
待時機成熟
日前阿佘在銅鑼灣接受訪問時，她語調一派輕鬆地說：「我已經攞咗一個月假，拍完《火舞黃沙》之後就會放假。我會拍到生BB就唔拍，唔知幾時㗎，點知有冇呀？鬼知咩？都未搵到適合結婚對象，要時機成熟至得。」
阿佘想生仔，自然會令人聯想起她的緋聞男友陳浩民。其實兩口子拍拖早已是公開秘密，但到了今天，她始終沒有認定對方的男友地位，她想了想便說：「應該係話未想去認定住，佢係一個好好嘅結婚對象，如果拍拖亦係一個好男朋友，但𠵱家都未係時候去考慮呢啲嘢，我想專注自己嘅事業先，趁重有本錢，想把握一啲屬於自己嘅嘢先。」
阿佘不認定戀情，這與陳浩民頻傳緋聞又是否有關連？她聞言嫣然一笑說：「講緋聞多，佢唔夠我多，唔可以用呢樣嘢去界定一個人嘅專一程度，好多嘢係煲水宣傳，係真係假心知嘅。」
阿佘雖然盛讚陳浩民是最佳男朋友兼好老公人選，可是對戀情始終有保留，問她會否想過這樣會傷陳浩民的心？她卻笑說：「佢成日喺內地同台灣做嘢，好忙，係咪有咁多時間傷心呀？唔覺得喎。」
謠言誤戀情
圈中人的戀情易來易去，有不少戀情被唱散的事實，阿佘承認謠言太多，對戀情的確不無影響，她說：「𠵱家風氣都係報憂不報喜，公開就唔排除有呢啲事發生，其實呢啲嘢係幾時都有，喺office一樣有是非，只不過娛樂圈係將啲是非公開，入行第一日就知道啦，惟有盡量諗啲位生存，保護私隱。」
談情說愛，阿佘的想法委實很簡單，她徐徐地說：「最緊要係真心鍾意，以前細個都係咁，但細個冇壓力，唔鍾意就散，𠵱家唔會咯，因為冇時間去試，搵結婚對象要畀時間觀察，𠵱家拍拖，會覺得有可能會成為一生一世。」
阿佘續說：「以前plan過好多嘢，諗過三十歲前生BB㗎，灰飛煙滅啦，我同TVB重有約，亦唔想半途而廢，我係一件事完咗再做另一件事嘅人，呢幾年都唔考慮住啦。」語畢沉靜片刻，然後又打趣說：「有意外就唔知。」
要有自主權
阿佘對愛情抱着隨緣態度，但談到不少圈中女星都會以嫁入豪門做少奶奶為目標，她稱管不了其他人的想法，然而她就一定不會，她說：「我唔鍾意靠人喎，從來都係靠自己，係有試過有啲有錢人追求，但生活方式夾唔到，唔鍾意，我鍾意有自主權，通常成功男士比較大男人同主觀啲，唔適合我，拍拖唔可以分有錢人定冇錢人嘅。」
阿佘又說：「我曾經都試過同富家子弟拍拖，唔work呀，不出一個月就冇咗，唔得就唔得。搵另一半係講一生一世，要好夾得嚟，互相遷就、互相尊重，是但一方都唔可以太主觀，開心係最緊要。呢個世界唔係只係講錢嘅，我睇錢唔重要，如果下半世為錢而生活得唔開心，冇咁嘅必要啫。」
