舒淇與林嘉欣合演新戲《怪物》前晚在深圳煞科，嘉欣透露日前生日要開工做怪物，除與小演員浸在水箱近九小時，浸出皮膚病外，長期化妝又引致肌肉抽搐，連舒淇也看不過眼大罵導演變態。
舒淇與林嘉欣近日趕拍新戲《怪物》，二人前晚在深圳綠景花園拍攝煞科戲，劇情講述舒淇與飾演怪物的嘉欣激戰一輪後，弄至全屋苑停電，一百位臨記飾的村民跑到街上，適逢前晚下大雨，導演鄭保瑞更乘機拍攝舒淇在大雨中跑來跑去的場景。
「細路都唔放過」
舒淇接受訪問表示拍該戲要與林嘉欣對打，有時也起用武器，十分辛苦，舒淇說：「我老公死咗，個仔又要俾人虐待，我成日話導演好變態，連細路都唔放過，要個小演員浸水箱同淋雨，重要吊威吔，辛苦過我。」
但舒淇謂她怎辛苦也不比要化妝成怪物的林嘉欣可憐，她說：「佢醜到連我見到佢都要避開。」問到拍完戲後會否母性大發想生仔，舒淇說：「唔會，生仔好煩，個小演員成日問我點解，好煩，養狗養貓都要負好大責任，何況生仔？」
最醜樣嘅生日
林嘉欣於八月十七日度過二十七歲生日，她說：「嗰日我拍戲重要做怪物，係最醜樣嘅生日，我重要同個小朋友一齊浸水箱，我哋兩日浸咗七至九個鐘，之後重有皮膚病，個小朋友急性皮膚敏感，我就起濕疹。」
嘉欣表示看到劉德華因拍《童夢》致皮膚病，也十分擔心，她說：「拍呢套戲真係終極辛苦，我塊面黐太多嘢，肌肉都抽搐，瞓覺時嘴角都戚起，流口水。」問到收男友甚麼生日禮物，嘉欣說：「未收到，禁止所有人嚟探班，遲啲補祝啦。」
採訪、攝影：蔡丹
