應邀到國金二期國金軒食晚飯，喺門口接待處等候之際，見到電影圈通天曉阿杜行緊入嚟，肯定係與左丁山同一個飯局啦，於是等埋佢。阿杜幾十年前放棄行船，唔做水手之後，上岸到電影公司?戲院打工，負責寫戲橋、宣傳稿，繼而主理大公司宣傳推廣，可謂閱人無數，有乜嘢電影明星趣聞逸事私隱事，問阿杜一定有答案。
呢晚阿杜有啲狼狽樣，怪而問之，阿杜嘆曰：「唉，行走江湖數十年，今晚老貓燒鬚，俾人偷走咗個公事包，好彩裏面冇乜值錢嘢，只有稿件、報紙、文件，啲賊可能睇到眼火爆，嘥咗心機搵唔到銀。」
阿杜成日手握公事包，點樣會俾人偷呀？據阿杜講，佢行入國金二期，上電梯之時，後面有三個男人，兩個貌似南亞裔，一個似鬼仔。阿杜突然間覺得件西裝濕咗，鬼仔猛講：「鎖你鎖你，雪糕倒瀉咗落你件衫度。」鬼仔重即刻拎紙巾同佢抹背脊。上到商場，阿杜諗住行入廁所除衫睇真啲，鬼仔陪佢入去，又大聲對廁所內員工講：「呢度冇廁紙嘅？」員工於是轉身去攞。正在此刻，兩個南亞裔亦入咗嚟，阿杜放咗個公事包落地，鬼仔略閃身，遮住佢視線，講多幾句應酬說話，行咗出去，阿杜見件西裝後面黏上一啲啡黃色物體，都唔知係乜，大嘆倒霉之際，向地下一望，公事包已經唔見咗，急忙追出去，鬼仔與兩位南亞裔已失去蹤影！
阿杜手戴金勞，十分耀眼，可能因為咁惹起「三人黨」注意。呢條係舊橋，以前左丁山寫過公關大姐大喺日內瓦火車站俾人潑茄汁落背脊，去廁所整理之事，日內瓦蠱惑仔之手法與阿杜遇賊，一模一樣，不過估唔到有人會喺國金二期商場內出術啫。阿杜講完古仔，飯局眾人反而關心佢嘅稿件，寫稿並不容易，如果內有十篇要重新寫過，好慘情㗎。