迪士尼樂園下個月十二日開幕，咁大件事，當然要搵位猛人來港揸鉸剪，話晒今次都係喺中國境內第一個老外主題公園落成啟用。早前已經有消息話，國家副主席曾慶紅會親自來港主持大典，順便挺一挺佢嗰位同宗煲呔曾，大家都係半信半疑，因為領導人嘅行蹤，唔到最後一分鐘都唔會話你知。
馬力擔櫈仔霸頭位
不過，民建聯主席馬力都話係，咁就唔同啦。馬主席對英文《中國日報》講，話曾副主席會見佢哋，又話係時候佢老人家應該親自嚟特區睇察吓民情。怕且馬主席都唔會放流料嘅。
八方計一計，今次應該係曾慶紅首次以副主席身份來港訪問，一直都話佢老哥𠵱家係香港問題最高話事人，佢細佬曾慶淮一早長駐香港搞文化工作，所以嚟唔嚟佢都一樣有渠道收堅料，唔使靠中聯辦或者土共。不過，既然煲呔係佢親手提拔，當然要嚟同佢打吓氣，震住班唔服氣嘅親中人士以及老董嘅殘餘勢力。
曾副主席來港，煲呔梗係十分重視，佢先要搞掂啲唔聽話嘅各方人士，叫呢班人收吓口，所以呢輪有乜要求，就快快出聲，煲呔會易就範好多。其次，就係啲大學民調，希望生生性性，唔好做到佢民望大跌，因為北京𠵱家好文明同科學化，覺得民調都有指標作用。
曾副主席有幾幫煲呔，只要大家記得今年初佢開口話老董「仍有不足」就知道啦，當時搞到特區政府倒瀉籮蟹，要急急出稿為副主席澄清，話記者聽錯，副主席冇咁講過，真係笑死人。點都好，老董都落咗台，冇謂再打扁佢。佢自己唔爭氣，北京咪搵你個副手取而代之囉。
講番曾副主席，佢以前係江澤民嘅親信，𠵱家胡溫上咗場，佢仍然穩如泰山，係人都知佢長袖善舞，成日笑笑口，都唔知佢諗緊乜。
民主派要通宵排隊
今次曾副主席嚟香港，一顯佢嘅親民作風，唔好話八方唔提醒各路人馬，如果有冤情，就要向中聯辦或者曾慶淮排隊報名，話唔定有機會接見，民主派最好通宵唔瞓去排隊，可能可以當面向佢陳述政改方案，到時唔成功，都可算係死而無憾！
煲呔得到曾副主席支持，其實係有人歡喜有人愁，聽講北京嘅魯平唔係幾開心。佢當年同錢其琛力保老董，跟新華社周南撐過，佢當年以為自己贏咗，點知衰收尾！
爆料熱線：29290000、27860099
報料傳真：26239278
報料電郵：[email protected]