夏天的日本，好極端。心血少的就晚晚浪漫溫馨趕赴煙花大會，膽生毛的則處處可見嚇鬼試膽大會，奪命狂呼今晚夜。剛啱開業一周年的復古Look「道頓堀極樂商店街」，3層無論食買玩昅都以堀江20年代Look示人，那懷古小食去幾次都征服不完（成五十幾檔，重周時開新店呀陰公！），而暑假重周圍都鬼聲鬼氣扮鬼飛天又唱歌，真的跟你來個「極樂」遊！
記者、攝影：陳慧敏
詭異婚禮邊唱邊跳
道頓堀極樂商店街位於大阪難波的舊劇場浪花座遺迹上，就在8層高大樓中的5到7樓，除了裝修，服務員、廚師、甚至攝影師手上的即影即有相機外（現場有人幫你影相留念），全都充滿古老風味。7樓中央有個劇場，開場前15分鐘，小記已經跟住人潮在前面霸位。燈光一暗，20年代，蝶子跟吉治郎的婚禮正式開始，新郎新娘，以及揹住大堆陪嫁用品的親朋戚友，居然就在人潮中跑出，閃到台上唱起歌來，先聲奪人。新郎新娘在這邊唱歌跳舞，電橙柱上突然有隻插住柳葉的麻甩鬼，唔捨得阿妹嫁人，出嚟搞破壞。
唔識㗎文都明
你道聽不懂日語無嘢睇？好在陳寶珠時代的簡單劇情與動作，劇情連太嫲都估到，最後親情贏晒大團圓結局。你只須跟住現場大人細路，「哦咩嗲多」的恭喜一對新人，或者一見鬼大佬出場，就專業地與眾奪命狂呼，甚至跟小記與部份觀眾一樣，抬頭細細聲「飛啦！飛啦！重唔飛？」的催影相，半個鐘，WEWE嘩嘩的過得好快。
懷古遊戲玩到眼盲
表演結束，工作人員好似走鬼般將劇場回歸原狀，繼續撈金魚、拋圈圈、釣波波，重有小丸子經常玩的，用頭針啪個圖案出來的絕種Game，老實講，昏黃燈光下，個指甲大少少嘅圖案真係睇到你眼花，不過這裏的檔主個個都好有良心，無論你玩得好不好，只要你加兩錢肉緊，三錢失望與哀怨，都會有份小禮物給你留念。玩遊戲每個?200-?300。
賣糖都要唱大戲
剛啱過一周年，商店街5樓「大福町」新設20台彈珠機。不似得街頭的彈珠機般巨型又閃閃發亮，細細部有啲似細個玩嗰啲彈花生機。其餘還有6樓「萬福町」新設的扭蛋機跟糖果店，可以即場幫你好似麵粉公仔般，搓隻糖果比卡超、史諾比或者吉蒂，糖果店雖然位於後街（鬼屋嗰條街），附近鬼聲鬼氣少人行，但班瘋瘋癲癲的服務員喺舖內周時大鑼大鼓，乜嘢陰氣都趕走晒喇！
一串二串通場走
超過50間懷舊小食分布喺三層樓的每個角落，包括日式燒餅、燒墨魚丸、雪糕、串燒及和菓子等等，路上幾乎個個都拮住串小食，頗有廟街Feel，不過呢度有冷氣歎呢。道頓堀街上極多墨魚丸檔，各位肚量有限，不細心挑只會飲恨而回，小記在「極樂世界」上上落落不下兩、三次，都見5樓有家墨魚丸店外坐滿人，有些還坐到對面舖。爆棚原因原來這家的墨魚丸裏混了牛奶，外層又塗了麻油再燒，加以秘製醬汁，特別香滑脆口。
一口咬珍珠蜂蜜雪糕
食完辣口墨魚丸，走過對面有蜜糖雪糕，老闆自設養蜂場，取蜂蜜做雪糕，雪糕夾在鬆脆貝殼形夾心餅中，好高貴，不過因為圓碌碌的關係，食時碌嚟碌去，大家都高貴唔嚟。另外還有蘋果醋蜜糖，店員大力推銷，飲啖，嘩，酸到無倫，下次我會叫佢輕手啲。
松治郎之舖
位置：5樓7號舖
電話：（81）662134121
老套玩意 買到手軟
飲飽食醉，出口處跟場內的小商店，都可以買到小丸子時代的小玩意，或者有商店街福神嘜頭的文具、餅乾或精品。小記最愛入精品店掃那一瓶瓶的微型乳酸糖、香口珠及吹氣紙波波等，還有羽毛球拍、鐵皮金魚錢箱，雖然翻轉個肚，嚇然發現都係MadeinChina，不過就夠晒日本民族Feel。
搵定免費入場券
入場時先要付入場費攞張「道頓堀Visa卡」，購物玩遊戲都是「碌卡」制，到離開時一次總結算。不過《KansaiWalker》、《Kansai一週間》或者網上都不時有免費入場Coupon，出之前可以先Check一Check，慳番都可以食到一串串燒㗎！
道頓堀極樂商店街
地址：大阪市中央區道頓堀1-8-22Sammy戎Plaza5至7樓
電話：（81）662125515
營業時間：11:00-23:00（年中無休）
票價：成人?315；小童?210
網址：www.doutonbori-gokuraku.com
出門提一提：
簽證：不論持BNO或特區護照均毋須簽證。查詢：25221184（日本領事館）
套餐：乘國泰航空往返大阪及香港，三日兩夜住宿新阪急酒店（四星）$3,899。查詢：23152000（東瀛遊）
貨幣：100日圓約兌7.06港元
求助電話：0664459481（中國駐大阪領事館）
鳴謝：東瀛遊
