到酒店飲下午茶，碰到酒店Ｍ。今年酒店生意極佳，入住率高，房租上升，做酒店嘅，梗係笑容滿面啦。酒店Ｍ話：「過咗暑假就進入旅遊旺季，每年十月都好難訂到房嘅嘞。今年重好，到咗十二月有WTO（世貿組織）會議召開，多多房都唔夠。咪話唔通知你，如果你有朋友年尾來港，我都幫唔到你。」
講起WTO會議，第一件事諗到嘅就係示威。近幾年來，但凡國際貨幣基金、世界銀行、Ｇ８財長會議、世界經濟高峯會、WTO會議等等，無論喺邊度舉行，都一定有大示威，將主辦城市搞到雞犬不寧，今年香港主辦，全世界啲無政府主義者、環保分子、農民、工會人士、反全球化人士、乜都反嘅人士，會否齊集香港，上演街頭大戰呢？佢哋如果來港，酒店有無房間供應呀？
酒店Ｍ話：「唔使咁驚喎，我估計一定有人嚟示威，但人數唔會多。我諗到嘅一個理由係，香港酒店房租好貴，示威人士未必住得起！我間酒店每晚至少收二千大元，佢哋點會入住呀？就算佢哋去住三星、二星，甚至時鐘酒店，租金都唔平。」
咦，住民宿、賓館、學校宿舍又如何？去到冇雷公咁遠嘅郊外度假營得唔得？酒店Ｍ講：「示威者應該乜都會諗過，譬如工會人士一定有同香港工會聯絡過，李卓人代佢哋傷腦筋會有可能㗎。至於在本土最惡嘅南韓農民就唔知點嘞，香港冇農民運動，難以幫忙，我聽到一個匪夷所思嘅方法，就係在維多利亞公園紮營！」嘩，好有創意，只怕維園阿伯唔肯噃，晨運人士都唔制，銅鑼灣區居民使唔使諮詢吓呢？
香港乜都貴，原來係阻止外國示威人士來港嘅一個理由。WTO今年主題之一係農業貿易，因為香港冇農業，點都搵唔到幾多個農民上街，WTO認真識揀，假如WTO會議在首爾舉行，日日會打崩頭。