亨達噚日請食飯，介紹研究部聯席新董事羅明立，佢專責外滙期權投資，又為客戶分析及制訂投資策略。 席間，外滙部董事兼副總經理施滄海話，任總三招搞到一啲同業冇啖好食，因為優化聯滙機制後，港元利息緊貼美國，影響靠港美利率脫節，從中賺取息差嘅行家，𠵱家生意大減。 對於散戶遠期不交收人民幣期貨服務，佢話，向客戶收取嘅孖展，估計至少要一成多，較美元、日圓同歐元嘅半成孖展為高，因為人民幣流通量唔夠高，較難平倉。